GAUTENG. – Bellermine Mugabe (28) en Tobias Matonhodze (33) is skuldig bevind en gevonnis, nadat hulle skuld erken het oor ’n voorval op 19 Februarie by ’n woning in Hyde Park. Konflik tussen die beskuldigdes en ’n veiligheidswag het tot aanranding gelei. Die wag is in sy laerug geskiet toe hy probeer weghardloop het.
Magaboke Mohlatlole, NVG-woordvoerder, sê die wag is buite die eiendom deur ‘n naburige veiligheidswag aangetref en die polisie is ontbied. Mugabe is in die Alexandra-landdroshof onder meer skuldig bevind aan oortreding van die immigrasiewet en die onwettige hantering van ’n vuurwapen, terwyl Matonhodze erken het dat hy die een is wat geskiet het. Mugabe is tot 24 maande tronkstraf of R400 000 boete vir die rig van ‘n vuurwapen gevonnis en 18 maande tronkstraf of ‘n boete van R200 000 vir oortreding van die immigrasiewet. Matonhodze is tot drie jaar direkte gevangenisstraf vir poging tot moord gevonnis.
Die NVG sê die hof se vonnisse in die saak in die Alexandra-landdroshof beklemtoon dat misdaad nie ongestraf sal bly nie. Volgens die NVG stuur die uitspraak ’n duidelike boodskap dat gewelddadige optrede en minagting van die wet ernstige gevolge sal hê.
