GAUTENG. – ‘n Gr. 3-leerling van Laerskool Lerutle in Daveyton, Ekurhuleni, is dood nadat ‘n muur Donderdag tydens pouse op ses leerlinge ineengestort het.
Steve Mabona, woordvoerder vir die departement van onderwys in die provinsie, sê die ernstig beseerde leerlinge is na verskeie hospitale geneem en die seun het later aan sy beserings beswyk terwyl hy behandeling ontvang het. Die omstandighede van die muur se ineenstorting word tans ondersoek. Die departement het psigomaatskaplike ondersteuning aan die slagoffers, hul families en onderwysers beskikbaar gestel om berading en emosionele bystand te bied tydens hierdie moeilike tyd.
Mabona sê Matome Chiloane, die LUR vir die departement, het sy diepe hartseer uitgespreek ná die tragiese dood van die seun. Hy het ook sy meegevoel uitgespreek teenoor die familie van die oorledene en die ander leerders wat beseer is.
