AFGHANISTAN. – ’n Naskok van 5.2 op die Richterskaal het Afghanistan gister getref nadat ’n aardbewing van 6.0 meer as 1 400 mense gedood het en 3 000 beseer gelaat het.
Lees ook: Dodetal styg ná aardbewing in Afghanistan
Reddingswerkers is steeds besig om na oorlewendes te soek wat moontlik onder rommel vasgekeer is. Die reddingswerk word met helikopters uitgevoer, omdat die aardbewing grondstortings veroorsaak het wat paaie onbegaanbaar gemaak het.
Die Taliban-regering het vir internasionale hulp vir die reddingspogings gevra. Die VN het noodbefondsing aan die land gegee en die VK het gesê dit sal $1.3 miljoen vir noodhulp skenk.
Indië het 1000 tente aan Kaboel geskenk en gehelp om kosvoorraad van Kaboel na Kunar te vervoer. China en Switserland het ook belowe om ondersteuning te bied.
Bronne: BBC, Daily Mail, Los Angeles Times
