NOORDWES. – ‘n Man (50) van Brits, by wie se huis Zahraa Mohammed (17) en Bataviya Mohammed (19) die niggie en neef, na hulle ontvoering aangehou was, is Dinsdag in hegtenis geneem.
Brig. Sabata Mokgabone sê die verdagte sal vandag in die Brits-landdroshof verskyn.
Die ander beskuldigdes, Humphrey Martin (48), Nathaniel Mokwena (41), Sendry Phage (58), Virgilo Hlongwane (33), Nkanyiso Hadebe (25), Boitumelo Bogatsu (44) en Thuloane Makume (47), het Maandag en Dinsdag in die Brits-landdroshof verskyn. Hulle sal tot hulle formele borgverhoor op 16 April in aanhouding bly. Een van die verdagtes is ‘n polisiesersant van die Letlhabile-speurtak.
Die niggie en neef is op 6 Maart ontvoer, waarna hulle op 25 Maart veilig met hulle families herenig is.
Die beskuldigdes word van ontvoering en afpersing aangekla.
Op die betrokke dag was die ontvoerde jongmense in ‘n Mercedes-Benz van Bataviya in Brits onderweg skool toe in Hartbeespoortdam. ‘n Maroenkleurige Audi A3 het hulle glo voor die laerskool van voor gestamp, sodat hulle moes stilhou. Na bewering het twee verdagte mans uit die Audi geklim en die twee slagoffers in ‘n wit Volkswagen Polo GTI, wat agter die Audi was, gedwing. Die verdagtes het ook in die Volkswagen geklim en weggery.
Die slagoffers en verdagtes se voertuie is op die toneel gevind.
