WES-KAAP. – Die NSRI kon Vrydag 22 vissermanne aan boord van ‘n vissersboot red nadat dit aan die kus van Kaapstad gesink het.
Die NSRI het omstreeks 09:30 bewus geword van die plaaslike vissersboot, ongeveer 30 seemyl suidwes van Tafelbaaihawe, wat water inneem. Die boot is deur ‘n plaaslike vissersboot gesleep en water is uitgepomp.
Verskeie rolspelers was op bystand om hulp te verleen. Omstreeks 10:00 het die NSRI ingegryp toe die seedeinings weens die windspoed verander het.
Die boot is laatmiddag ongeveer 20 seemyl van Oudekraal bereik. Die sleeptou van die sinkende boot is losgemaak en die bemanning op ‘n reddingsboot en daarna op die NSRI-reddingsboot oorgelaai.
Die vissermanne is veilig na Tafelbaaihawe geneem waar paramedici ‘n beseerde visserman behandel en na ‘n hospitaal vervoer het. Die oorblywende 21 bemanningslede is ongedeerd.
Die suksesvolle reddingsoperasie is geprys. Die moontlike omgewingsimpak van die gesinkte vissersboot word deur owerhede beoordeel.
