Die SA Reserwebank en die Gedragsowerheid vir die Finansiële Sektor (FSCA) het bevestig dat die tydperk waarin debietorders betwis kan word, vanaf 13 April 2026 tot 60 dae gestandaardiseer sal word.
Die verandering is daarop gemik om die stelsel vir alle debietorder-instrumente te vereenvoudig en eenvormig te maak. In die verlede het die tydperk waarin ’n betaling betwis kon word, verskil na gelang van die tipe debietorder en kon dit in sommige gevalle tot ’n jaar wees. Onder die nuwe reëls kan verbruikers ’n debietorder tot 60 dae ná die aftrekking betwis. Ná dié tydperk sal ’n dispuut nie meer outomaties verwerk word nie en sal kliënte direk met die diensverskaffer moet skakel.
Die verandering vorm deel van ’n breër poging deur die bankbedryf en regulatoriese owerhede om die misbruik van debietorders te beperk en die proses vir banke, diensverskaffers en verbruikers meer doeltreffend te maak.
Bronne: Nedbank, Business Tech, Business Report/IOL, MyBroadband en Fulcrum
