VRYSTAAT. – Media-berigte dat regter Loubser op 3 Junie sou gesê het dat die staat immoreel sou opgetree het in die asbestos-saak in Bloemfontein, is vals.
Mthunzi Mhaga, die nasionale woordvoerder vir die NVG, sê in ‘n verklaring sommige media-instellings het berig dat die regter bevind het dat die staat die uitleweringsaansoek in die VSA van Moroadi Cholota wanvoorgestel het.
Die saak spruit uit ‘n kontrak van R255 miljoen waarin Ace Magashule, die voormalige Vrystaatse premier, glo betrokke is. Magashule is van korrupsie, bedrog en geldwassery aangekla. Cholota is Magashule se voormalige persoonlike assistent.
Die regter het egter Woensdagoggend in die hof verklaar dat hy geen sodanige stelling gemaak het nie. “Die nasionale vervolgingsgesag (NVG) het volle vertroue in die vervolgingspan, wat hulself professioneel gedra en in oorstemming met die NVG se waardes van integriteit en professionaliteit opgetree het,” het Mhaga in reaksie daarop gesê.
In ‘n ander verklaring het Mhaga Woensdag gesê die NVG neem kennis van die Bloemfontein-hooggeregshof se uitspraak waarin Cholota se pleit gehandhaaf is dat die hof geen jurisdiksie in haar uitlewering gehad het nie. Die NVG oorweeg dit om teen die uitspraak te appeller. Die verhoor teen die oorblywende beskuldigdes sal voortgaan, soos beplan.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
