MPUMALANGA. – ‘n Staatsaanklaer is Maandag in die Kwaggafontein-landdroshof skuldig bevind aan minagting van die hof en ‘n lasbrief vir sy inhegtenisneming is uitgereik. Die Nasionale Vervolgingsgesag (NVG) het aangekondig dat die aanklaer geskors sal word terwyl dissiplinêre stappe teen hom ingestel word. Die Demokratiese Alliansie (DA) het die NVG gevra om te verduidelik hoe dit kon gebeur dat ‘n aanklaer nie by ‘n hoëprofiel borgtogverhoor opgedaag het nie. Die polisie in Mpumalanga het intussen verseker dat hulle steeds ‘n sterk saak teen vier verdagtes in die Kwaggafontein-afpersingsaak het, ten spyte daarvan dat die saak Maandag van die hofrol geskrap is. Die aanklaer is volgens Mamelodi News 24 en ander berigte as Mkhuseli Ntaba geïdentifiseer, wat glo vir sy lewe vrees en daarom skuil.
Adv. Mthunzi Mhaga, die spesiale direkteur van openbare vervolging, het verduidelik dat die voorval ontstaan het toe die aanklaer versuim het om te verskyn vir die voortsetting van die borgtogsaansoek in die saak van die Staat teen Madoda Johannes Sibanyoni en ander, waar die beskuldigdes op afpersing en geldwassery tereg staan. Die saak kan slegs herstel word indien die Direkteur van Openbare Vervolging vir die Mpumalanga-afdeling dit skriftelik magtig. Die NVG besin tans oor die hofbevel en sal bepaal of dit die mees gepaste manier is om die situasie aan te spreek. Die Direkteur van Openbare Vervolging is reeds in gesprek met die ondersoekbeampte om die herstel van die saak op die rol te bespoedig.
Adv. Andy Mothibi, die Nasionale Direkteur van Openbare Vervolging, het gesê hy is geskok en ontsteld oor wat gebeur het en het die gemeenskap gevra om geduldig te wees terwyl die saak intern en saam met die polisie opgelos word. Hy het beklemtoon dat die NVG die volle reg het om die saak te herstel sodra aan alle regsvereistes voldoen is.
Adv. Glynnis Breytenbach, DA-woordvoerder oor Justisie en Grondwetlike Ontwikkeling, sê dat taxibaas Joe “Ferrari” Sibanyoni, wat van afpersing en geldwassery aangekla word, Maandag die hof kon verlaat sonder dat sy borgtogsaak afgehandel is – nadat die NVG se aanklaer sonder verduideliking afwesig was. Breytenbach het die voorval beskryf as nog ‘n bewys dat die NVG sukkel om ernstige misdaadsake doeltreffend te hanteer. Sy het bygevoeg dat die NVG onlangs vroeë aftreepakkette aan sy mees ervare advokate aangebied het, van wie 47 dit aanvaar en einde April afgetree het. Die DA bevraagteken hoe die NVG hoëprofielsake kan hanteer terwyl dit van sy mees ervare regslui verloor.
Kol. Mavela Masondo, polisiewoordvoerder, het bevestig dat die saak geskrap is nadat die aanklaer nie in die hof verskyn het nie. Die Mpumalanga Georganiseerde Misdaadeenheid het egter beklemtoon dat die bewyse teen die verdagtes steeds ongeskaad is en dat hulle vertroue het in hul saak. Die vier verdagtes is in hegtenis geneem ná ‘n georganiseerde misdaadondersoek. Die polisie het gerugte weerlê dat hul ondersoekbeamptes nie Maandag in die hof teenwoordig was nie. Die polisie sal voortgaan om met die NVG oor die verdere verloop van die saak te skakel.
Die Mpumalanga Georganiseerde Misdaad-eenheid het op 12 Mei 2026 drie verdagtes op aanklag van afpersing in hegtenis geneem. Die verdagtes is onderskeidelik in Gauteng en Mpumalanga in hegtenis geneem. Daar was op die betrokke datum steeds een verdagte voortvlugtig. Die verdagtes het na bewering oor ‘n lang tydperk geld van ‘n sakeman geëis, totdat hy die saak in 2025 by die Kwaggafontein-polisiekantoor aangemeld het. Die saak is daarna na die Georganiseerde Misdaadeenheid verwys, wat uiteindelik tot die inhegtenisnemings gelei het.
