GAUTENG. – Die departement van basiese onderwys waarsku teen sogenaamde Pens Down-byeenkomste wat ná die matriekeksamen gehou word, wat hand-uit kan ruk.
Die onwenslike kan gebeur wanneer daar geen beplanning of volwasse toesig tydens sulke partytjies is nie. Sonder behoorlike toesig neem die risiko’s vinnig toe, insluitend oormatige drankgebruik, gewelddadige konflik, skade aan eiendom en ernstige bedreigings vir persoonlike veiligheid. Wat as ’n viering begin, kan gou ’n noodlottige gebeurtenis word wat lewens verander.
Die departement van maatskaplike ontwikkeling sê sodra penne neergesit word, moet verantwoordelikheid toeneem. Leerlinge word gevra om nie aan groepsdruk toe te gee nie. Hulle moet liefs hulle veiligheid en toekoms eerste stel.
Die SA-regering moedig ook leerlinge aan om vir sulke tipe partytjies nee te sê. Ouers en oppassers word versoek om betrokke te bly.
