GAUTENG. – ’n Onderwyser wat deur Hoërskool Sunward Park in Boksburg, Ekurhuleni, se beheerliggaam aangestel is, is Donderdag ná beweerde ernstige bewerings van seksuele aanranding en verbale mishandeling van meisieleerlinge, afgedank.
Steve Mabona, GDO-woordvoerder, sê in ‘n verklaring die beweerde voorvalle het sedert 2024 plaasgevind, op sowel die skoolterrein as buite die perseel, met die mees onlangse voorval in Augustus 2025. Ouers het op 27 Augustus klagtes ingedien, waarna die onderwyser die volgende dag geskors is. Hy is vandag in ’n dissiplinêre verhoor in absentia afgedank. Die klagtes het drie aanklagte van seksuele aanranding en een van verbale wangedrag ingesluit.
Volgens die departement is die onderwyser skuldig bevind aan die oortreding van die Kode vir Professionele Etiek, en sy afdanking sal aan die Suid-Afrikaanse Raad vir Opvoeders (SACE) gerapporteer word met ’n aanbeveling dat sy naam permanent uit die register verwyder word. Dit sal sy onderwysakkreditasie intrek en hom verhinder om weer in Suid-Afrika as opvoeder aangestel te word.
“Die GDE veroordeel enige vorm van geweld, mishandeling of wangedrag deur opvoeders ten sterkste. Onderwysers word met die veiligheid, sorg en ontwikkeling van leerlinge vertrou, en enige skending van daardie vertroue word met die grootste erns hanteer. Skole moet veilige ruimtes wees waar leerlinge akademies en persoonlik kan floreer sonder vrees vir skade,” het Matome Chiloane, Gauteng se LUR vir onderwys, gesê.
Hy het bevestig dat berading en ander ondersteuningsdienste aan die betrokke leerlinge beskikbaar gestel sal word. Chiloane het verder ouers, leerlinge en die publiek aangemoedig om enige wangedrag deur onderwysers by die skoolbestuur, distrikskantore of deur die departement se hulplyn en WhatsApp-lyne aan te meld.
Leerlinge wat seksuele teistering of aanranding ervaar, kan hulp kry by Childline deur 116 te skakel. Die Suid-Afrikaanse Depressie- en Angs-groep (SADAG), wat saam met die departement werk om leerlinge se geestesgesondheid te beskerm, is bereikbaar by 0800 567 567 of 0800 456 789. Die GDO kan ook gekontak word by 0800 000 789 of via WhatsApp by 060 891 0361.
