MPUMALANGA. – ‘n Ontbinde liggaam van ‘n man wat Woensdagaand op die dak van die Hazyview-polisiekantoor in die Laeveld gekry is, kon Donderdagoggend van die dak afgehaal word. “Die miljoen dollar-vraag is hoe hy op die dak beland het. Daar is ook gereedskap naby sy liggaam gevind,” sê brig. Donald Mdhluli.
Brig. Mdhluli, provinsiale polisiewoordvoerder, sê aan Nuusflits ‘n ondraaglike reuk van die afgelope drie weke het Woensdag ‘n soektog na vermoedelik ‘n dooie dier genoop. Die aanvanklike soektog het geen lig op die onderwerp gewerp nie. Dakteëls is Woensdag verwyder, waarna die liggaam onder dakbalke gekry was. Die operasie is met behulp van speurders, die soek- en reddingspan, Mbombela-brandweer, die plaaslike kriminele rekordsentrum en Opod aangepak, waarna die liggaam Donderdagoggend verwyder is. Voorlopige ondersoek dui daarop dat die man, wie se liggaam in ‘n toestand van ontbinding was, moontlik doodgeskok is.
‘n Geregtelike doodsondersoek is geopen en die ondersoek duur voort. Die oorledene is nog nie geïdentifiseer nie en die polisie vra lede van die gemeenskap wat daarmee kan help, om na vore te kom.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
