VRYSTAAT. – ’n Man (29) wat glo Vrydag in Steyn ontvoer is, is binne ure veilig in Welkom gered nadat ’n gesamentlike polisie-operasie gelei het tot die inhegtenisneming van ses verdagtes tussen die ouderdomme van 28 en 46 jaar. Die slagoffer is na bewering met ’n vuurwapen by sy woning in Steyn ontvoer.
Sers. Palesa Thabana, polisiewoordvoerder, sê die voorval is by die Welkom-polisie en die provinsiale moord-en-roofeenheid in Thabong aangemeld. Volgens Thabana het die slagoffer se familie later oproepe van die vermeende ontvoerders ontvang waarin ’n onbekende losprys vir sy vrylating geëis is. Lede van die Welkom K9-eenheid en die Parkweg taktiese reaksie-eenheid is ontplooi nadat inligting ontvang is wat die polisie na ’n woning in Flamingo Park gelei het. Die huis is omsingel, waarna die verdagtes glo probeer vlug het, maar hulle is kort daarna aangekeer. Die slagoffer is tydens die deursoeking van die woning in ’n motorhuis gevind. Sy hande was agter sy rug vasgebind en hy was volgens die polisie in ’n ernstige toestand van skok. Hy het ook beserings aan die agterkant van sy kop, asook kneusplekke aan sy hande en voete opgedoen.
Polisie het op twee handwapens, ammunisie en drie voertuie beslag gelê. Verdere ondersoek het aan die lig gebring dat een van die voertuie glo in Winburg gesteel is. Die ses verdagtes sal na verwagting Maandag op aanklagte van ontvoering, afpersing, die besit van ongelisensieerde vuurwapens en die besit van ’n vermoedelik gesteelde voertuig in die Welkom-landdroshof verskyn.
