MPUMALANGA. – ‘n Slagoffer wat Sondag saam met ‘n voertuig gekaap is, is deur die vinnige optrede van die Nelspruit-blitspatrollie gered en die voertuig teruggekry. ‘n Verdagte (48) is in hegtenis geneem.
Kol. Donald Mdhluli sê dit was kort voor middernag toe lede tydens roetine patrollie op die N4 inligting van ‘n opsporingsmaatskappy oor ‘n kaping met ‘n slagoffer in die voertuig ontvang het. Die polisie en opsporingspan het die voertuig in Kabokweni opgespoor. Drie verdagtes het uitgespring en gevlug, waarna die vasgebinde slagoffer gevind is.
“Die omliggende gebiede in die bosse is deursoek, waartydens ‘n verdagte vasgekeer en gearresteer is. Hy het glo die slagoffer se selfoon in sy besit gehad.”
Hy sal op aanklagte van kaping, ontvoering en roof in die Kabokweni-landdroshof voorkom. Daar word steeds na die ander verdagtes gesoek.
