GAUTENG. – ’n Beplande optrede deur Brinant Security Group, saam met ander wetstoepassings- en veiligheidspanne, het Sondag gesorg dat ontvoerde slagoffers veilig teruggevind is en verskeie verdagtes vasgetrek is.
Inligting is ontvang oor ‘n voertuig wat moontlik by ‘n ontvoering betrokke was. ‘n Operasie is geloods waartydens die verdagtes in die Welbekend-gebied opgespoor is. Twee het te voet probeer ontsnap, maar is kort daarna vasgetrek. Daarna is met ‘n BMW in die rigting van die Lakes-gebied gevlug, wat gelei het tot ’n hoëspoedjaagtog. Tydens die agtervolging het die verdagte glo skote op die veiligheidspanne geskiet. Ten spyte van die gevaarlike situasie het die span, met ondersteuning van verskeie rolspelers, daarin geslaag om die voertuig tot stilstand te bring en die oorblywende verdagte in hegtenis te neem. Alhoewel van die voertuie tydens die voorval beskadig is, is niemand beseer nie.
Die sukses van die operasie beklemtoon die goeie samewerking en vinnige reaksie van almal wat betrokke was. Brinant Security Group het weer hul toewyding bevestig om gemeenskappe veilig te hou.
