MPUMALANGA. – Ongeveer 150 onwettige myners is in Sabie in ‘n verlate myn vasgekeer. Drie is dood en ses kon gered word.
Brig. Donald Mdhluli sê die K9-eenheid van ‘n veiligheidsmaatskappy het tydens patrollering op plase op vier vlugtende mans afgekom. Daar is uitgevind hulle is onwettige myners. Nog myners is steeds ondergronds vasgekeer.
Polisiebeamptes van operasie Vala Umgodi, ander polisie-eenhede, nooddienste en ander rolspelers is na die plek waar die persone glo vasgekeer is.
Mdhluli sê tot dusver is vier Suid-Afrikaners en twee buitelanders suksesvol gered. Hulle beweer hulle het onder dwang, vir “ontvoerders,” in gevaarlike en erge toestande vir goud gemyn. Drie individue is vasgekeer, wat in die skag gesterf het.
Daar word geglo diegene wat in beheer van die onwettige operasie is, is moontlik swaar gewapen. Die vermoede word deur gebeure op 28 November bevestig, toe beweerde onwettige myners wetstoepassingsbeamptes aangeval en ‘n polisiebeampte van die honde-eenheid beseer is. Drie verdagtes is ook noodlottig gewond.
Sigbaarheid in die area is verskerp om gemeenskapsveiligheid te verseker. Die situasie word gemonitor en alle rolspelers, asook soek-en-reddingseenhede, is teenwoordig.
