GAUTENG. – Altesaam sewe vermeende onwettige myners is Dinsdag in Primrose deur Ekurhuleni-metrobeamptes in hegtenis geneem na ‘n skietery waartydens ses gewond is.
Lt.kol. Kelebogile Thepa, woordvoerder vir die EMPD, sê hulle het Dinsdag saam met die SAPD ‘n operasie geloods om onwettige mynery aan te spreek.
Ten tyde van die operasie het wetstoepassers op die hoek van Main Reef- en Johann Rissikstraat opgedaag. Nadat verdagtes hulle opgemerk het, is daar glo op die lede geskiet, wat teruggeskiet het. Ses van die verdagtes is gewond en hulle is ontwapen. Die ses beseerde verdagtes, tussen die ouderdom van 27 en 33 jaar, is vir mediese hulp na die naaste hospitaal vervoer. ‘n Verdagte wat glo probeer vlug het, is in hegtenis geneem.
Wetstoepassers het op ‘n bruin dubbelloop-haelgeweer met sy reeksnommer, ‘n swart 12-boor haelgeweer met sy reeksnommer, ‘n swart Taurus 9 mm-handwapen met ‘n afgevylde reeksnommer en ‘n onbekende aantal lewendige ammunisie, beslag gelê.
Die sewe verdagtes word deur aanklagte van poging tot moord en die besit van onwettige vuurwapens en ammunisie in die gesig gestaar.
Die verdagtes sal na verwagting in die Germiston-landdroshof verskyn.
