WES-KAAP, SUID-AFRIKA. – Jurgen van Staden (20), ’n sportassisstent verbonde aan Laerskool Hartenbos, is Maandagoggend in die Groote Schuur-hospitaal in Kaapstad oorlede.
Mosselbay Advertiser berig Van Staden het weens ’n hartsiekte gesterf. Hy is glo vanaf die begin van Februarie siek en is in Mosselbaai gehospitaliseer. Volgens berigte het hy verdere behandeling op George ontvang en is hy die naweek na die Groote Schuur-hospitaal in Kaapstad oorgeplaas.
Laerskool Hartenbos het op hulle Facebook-blad hulde aan Van Staden gebring. “Ons het vanoggend ’n ware vriend en kollega aan die dood afgestaan. Baie sterkte vir sy familie en geliefdes in hierdie tyd.”
Sy almal mater, Hoër Landbouskool Oakdale op Riversdal, het ook ’n huldeblyk op hulle Facebook-blad geplaas. Hy het in 2022 daar matrikuleer. “Jurgen was geliefd onder personeel en leerders en sy karakter van liefde, nederigheid, respek, vriendelikheid en lojaliteit het bygedra tot sy besonderse wyse van menswees.”
Jurgen laat sy ouers sowel as ’n jonger broer en ouer suster agter.
Bronne: Mosselbay Advertiser, Facebook
