KWAZULU-NATAL. – ‘n Pa (44) en dogter (11) is gehospitaliseer nadat hulle Dinsdag ternouernood aan verdrinking ontkom het deur aan ‘n opblaasband vas te hou totdat hulle veiligheid bereik het.
Kyle Farrell van die NSRI in Port Edward sê die pa en dogter van Benoni was met die opblaasband in sterk seestrome vasgevang. Die pa, sy twee dogters en sy suster was met vakansie toe die insident plaasgevind het.
Bemanning aan diens is omstreeks 10:40 deur ‘n ooggetuie van ‘n verdrinking voor Caribbbean Estate bewus gemaak. Alle rolspelers is ontplooi.
Ooggetuies beskryf hoe die pa en dogter desperaat probeer het om by die strand uit te kom. Hulle het aan die handvatsels van die opblaasband vasgehou en dit het gelyk asof hulle teen die skeurstroom swem. Hulle is aanhoudend in die golwe gedompel en het die drywende toestel verloor, maar dan weer teruggekry. Die pa en dogter het aan die toestel bly vashou totdat hulle in vlak water was.
Farrell sê twee werknemers van Caribbean Estate het alarm gemaak en ‘n NSRI- pienk reddingsboei gegryp om die water in te gaan om die pa en dogter te help, maar hulle het toe reeds die vlak water bereik, en is na die strand gehelp.
“Albei het nie-noodlottige verdrinkingsimptome gehad.”
KZN-regeringsnooddienste het die pa en dogter gestabiliseer en na ‘n hospitaal vervoer, waar hulle na verwagting ten volle sal herstel.
“Die Caribbean Estate-personeel is vir die vinnige alarm wat hulle gemaak het, bedank, asook die twee personeellede wat op die toneel gehelp het. Die vinnige reaksie van die NSRI, polisie, lewensredders en mediese nooddienste word ook geprys.”
