GAUTENG. – Die nasionale vervolgingsgesag het voorlopig besluit om nie die beweerde padwoedevoorval van Sondag in Emmerentia op die hofrol te plaas nie, aangesien die ondersoek nog nie afgehandel is nie. Nuusflits het berig oor die beweerde padwoede wat tragies geëindig het met een man dood en twee ander persone beseer. In ‘n video lê die pa op die padoppervlak. Ná die noodlottige konfrontasie het ‘n jong meisie histeries gehuil en op die toneel rondbeweeg en ‘n jong seun het met sy hande op sy pa se lyf gesit, asof hy KPR wou toepas.
Magaboke Mohlatlole, NVG-woordvoerder, sê die beskikbare bewyse is oorweeg, maar daar is bevind dat dit nie in hierdie stadium sterk genoeg is om met vervolging voort te gaan nie. Volgens Mohlatlole moet verdere inligting ingesamel word om die saak behoorlik te kan beoordeel. Die ondersoek bly dus oop en ’n finale besluit sal oor moontlike vervolging geneem word sodra dit voltooi is.
Die vervolgingsgesag het beklemtoon dat alle besluite geneem word op grond van voldoende en betroubare bewyse, in belang van geregtigheid.
Lees meer oor die voorval hier onder:
