NOORDWES. – Die polisie en weermag het Dinsdag ‘n besending onwettige sigarette met ‘n geskatte waarde van R8 m. in ‘n vragmotor, wat na bewering ‘n pap band ondervind het, onderskep.
Kol. Adéle Myburgh sê weermaglede het die grenslyn tussen Suid-Afrika en Botswana naby Makgobistad gepatrolleer. Hulle het ‘n verdagte vragmotor, wat glo weens ‘n pap band gestop het, raakgesien. Die weermaglede het die vragmotor genader, waarna die bestuurder uitgespring en te voet Botswana in gevlug het.
‘n Besending onwettige sigarette is in die vragmotor gevind na die polisie ontbied is. Die besending is gekonfiskeer.
Die ondersoek deur die Valke duur voort.
