KWAZULU-NATAL. – ‘n Pasgebore babaseun is Saterdagmiddag buite ‘n huis in Vusi Mtshali-rylaan in die R-afdeling van Umlazi gevind, nadat hy vermoedelik daar agtergelaat is.
Reaction Unit South Africa (Rusa) sê die inwoner het ná sy terugkeer van die werk die baba, wat in ‘n kombers toegedraai was, voor die voordeur van sy huis aangetref. Die baba se naelstring en plasenta was nog aan hom geheg, maar hy het ten spyte van die omstandighede gesond voorgekom. Volgens Rusa het die inwoner die betrokke owerhede omstreeks 21:30 van die voorval in kennis gestel. Teen 23:30, toe Rusa die inligting bekend gemaak het, het geen hulpdienste egter nog opgedaag nie.
Enigiemand wat hulp kan verleen of inligting oor die voorval het, word versoek om Rusa by 086 1234 333 te skakel.
