WES-KAAP. – Die polisie sê ’n ontbinde liggaam is Sondagoggend in ’n begraafplaas langs die N2 oorkant die Knysna- provinsiale hospitaal gevind. Die publiek se hulp word gevra om die oorledene te identifiseer of sy familie op te spoor.
AO Christopher Spies, polisiewoordvoerder, sê lede van die Tsitsikamma K9-eenheid was besig met patrollies toe twee mans hulle voorgekeer en na die begraafplaas geneem het. Daar het hulle die ontbinde liggaam in ’n vlak stroom ontdek. Die oorledene het ‘n grys denimbroek aangehad. ’n Geregtelike doodsondersoek is geopen en ’n nadoodse ondersoek is reeds gedoen om die oorsaak van dood te bepaal. Die verslag word nog afgewag.
Enigiemand met relevante inligting kan die ondersoekbeampte, sers. Denzil Cook, by 044 302 6652 bel.
