GAUTENG. – ‘n Polisiekonstabel (35), verbonde aan die misdaadvoorkomingseenheid van Eldorado Park-polisiekantoor, is vandag (Vrydag) deur Opod in hegtenis geneem. Hy word van poging tot moord en versuim om ‘n misdaadtoneel aan Opod te rapporteer, aangekla. Sy saak is aan die moordsaak van Chesnay Keppler (22) gekoppel.
Lizzy Suping, Opod-woordvoerder, sê Keppler, ‘n Gautengse crime warden, is gedurende Desember verlede jaar glo deur Mandla Buthelezi, haar kêrel, met sy dienswapen doodgeskiet. Buthelezi, wat destyds ook by Eldorado Park-polisiekanoor gestasioneer was, is tans op borgtog vry. Volgens Opod was die konstabel saam met Buthelezi tydens die voorval. Hy het ‘n rusie met Keppler se drie vriende gehad, waarna hy hulle glo aangerand het. Skote is in hulle rigting geskiet en hulle het die toneel verlaat.
Die konstabel word deur aanklagte van poging tot moord, regsverydeling en oortreding van artikels 29(1) en 33(3) van die Opod-wet in die gesig gestaar. Die konstabel bly in aanhouding en sal Maandag in die Protea-landdroshof verskyn.
