OOS-KAAP. – ’n Skietvoorval het die lewe van ’n polisieman geëis terwyl sy vroulike kollega in ’n kritieke toestand in die hospitaal is ná ’n aanval in New Brighton, Ngangelizwe, buite Mthatha.
Brig. Nobuntu Gantana sê die twee beamptes het Woensdagmiddag ná diens in ’n bakkie buite die vroulike beampte se woning gesit toe hulle deur gewapende aanvallers geteiken is. Ondersoeke dui daarop dat ’n wit Volkswagen Polo vroeër naby die toneel gesien is. Twee mans het glo uit die voertuig geklim, na die bakkie gestap en verskeie skote geskiet voordat hulle in die rigting van Port St. Johns op die R61 gevlug het. Die manlike beampte is op die toneel dood verklaar. Sy kollega kon ten spyte van haar beserings hulp ontbied en is hospitaal toe geneem waar sy steeds om haar lewe veg.
Forensiese beamptes het verskeie 9 mm-doppies op die toneel gevind. Die identiteit van die oorledene sal bekend gemaak word sodra sy familie in kennis gestel is. Die motief vir die aanval is nog nie bekend nie en die polisie ondersoek sake van moord en poging tot moord. Enigiemand met relevante inligting word gevra om na vore te kom.
