GAUTENG. – ’n Polisiebeampte (41), verbonde aan die direktoraat vir prioriteitsmisdaadondersoeke, en ’n Tembisa-hospitaalbeampte (53) verskyn vandag op aanklagte van korrupsie in die Pretoria-landdroshof.
Luidens ‘n verklaring Sondag deur brig. Thandi Mbambo, Valke-woordvoerder, is ’n ondersoeker deur die verdagte polisiesersant genader, wat aangedui het die hospitaalbeampte wou met hom vergader oor ’n lopende ondersoek wat met die hospitaal verband hou. Die sersant het glo verduidelik dat die hospitaalbeampte hulp verlang en bereid was om ’n vergoeding aan te bied om vervolging in die ondersoek te vermy.
Die ontmoeting het Sondag plaasgevind, waartydens R100 000 in kontant oorhandig is. Tydens ‘n operasie, goedgekeur deur die direkteur van openbare vervolgings, is die sersant sowel as die hospitaalbeampte in hegtenis geneem.
