MPUMALANGA. – Katleho O’Hara Mokonyane en Bonelela Mgudlwa, mede-eienaars van die Tark Group, moet die wins wat hulle uit onreëlmatige PPE-kontrakte gemaak het, terugbetaal nadat die Spesiale Tribunaal die ooreenkomste tersyde gestel het. Die kontrakte, wat tydens die Covid-19-tydperk deur die Mpumalanga-departement van gesondheid toegeken is, is as onwettig en ongeldig verklaar.
Selby Makgotho, woordvoerder van die Spesiale Ondersoekeenheid (SOE), sê die ondersoek het gewys dat Tark Group (Pty) Ltd onregmatig voordeel getrek het uit die voorsiening van maskers en beskermende oorpakke. Die tribunaal het beslis dat die maatskappy se eienaars persoonlik aanspreeklik gehou word vir die onregmatige wins. Die ondersoek het ook ernstige tekortkominge in die verkrygingsproses uitgewys, onder meer dat voorgeskrewe prosedures omseil is en dat ’n verskaffer sonder die nodige goedkeurings aangestel is. Amptenare van die departement is ook gekritiseer vir hul rol in die onreëlmatighede.
Die uitspraak vorm deel van die pogings om staatsgeld wat tydens die pandemie verlore gegaan het, terug te kry. President Cyril Ramaphosa het die eenheid destyds opdrag gegee om bewerings van korrupsie en wanadministrasie rakende PPE-tenders te ondersoek. Die SOE sê hy sal voortgaan om op te tree teen enigiemand wat onregmatig voordeel trek uit staatskontrakte en sal sake na die nasionale vervolgingsgesag verwys waar nodig.
Druk hier om meer te lees.
