President Cyril Ramaphosa het Mcebisi Jonas as ’n spesiale gesant na die VSA aangestel. Hy het aangekondig Jonas is die amptelike verteenwoordiger van die president en die regering van Suid-Afrika en is verantwoordelik daarvoor om Suid-Afrika se diplomatieke, handels- en bilaterale prioriteite te bevorder.
Lees ook: Donald Trump dreig om G20-beraad te boikot
Jonas is ‘n voormalige adjunkminister van finansies. Hy was destyds ‘n sleutelgetuie voor die Zondo-kommissie se ondersoek na staatskaping. In 2018 was hy een van vier presidensiële beleggingsgesante wat aangestel is om meer beleggers na Suid-Afrika te lok.
Ramaphosa het gesê hy is toegewy daaraan om die werksverhouding met die VSA te herbou en dit te bevorder op ’n basis van respek, erkenning van die lande se soewereiniteit en voordeel vir al die mense.
Bronne: SA Regering
