VSA. – R Kelly se prokureur het beweer sy kliënt het ‘n oordosis medisyne in die tronk ontvang in ‘n poging om hom dood te maak.
Lees ook: R Kelly wil skuldigbevinding oor kinderpornografie omgekeer hê
Beau B Brindley, Kelly se prokureur, het gesê daar is verlede week met Kelly na ‘n hospitaal gejaag dae nadat hulle ‘n mosie ingedien het waarin hulle gesê het Kelly se lewe is in gevaar. Brindley het beweer federale tronkowerhede by die Butner Federale-tronk in Noord-Carolina het hom doelbewus te veel medisyne gegee om hom dood te maak.
Brindley het Maandag ‘n noodversoek ingedien om Kelly tydelik onder huisarres vry te laat. Hy het in die versoek die getuienis van ‘n ander gevangene, Mikael Glenn Stine, gehad wat beweer ‘n wit oppermaggroep en tronkpersoneel werk saam om Kelly dood te maak. Stine het beweer die personeel wou keer dat Kelly se prokureurs inligting wat hulle ontvang het, vrystel en het die Aryan Brotherhood se leier gevra om Kelly dood te maak.
Kelly is na eensame aanhouding geskuif ná Stine se bewerings, maar Brindley het gesê dis “onmenslik”.
Brindley het ook vroeër die maand gesê Donald Trump moet Kelly oor die “komplot” vryspreek. Federale aanklaers het gesê Brindley se aantygings is “aanstootlik” en het hom gekritiseer vir sy pogings om Kelly te laat vrylaat.
Bronne: The Independent, Meaww, Hindustan Times
Lees ook: R Kelly wil skuldigbevinding oor kinderpornografie omgekeer hê
