WES-KAAP. – Raadsheer Johan Allers, leier van die VF Plus in Oudtshoorn, het sy medelye met die Jonker-familie uitgespreek ná die afsterwe van Sagaria “Saag” Jonker.
Allers beskryf Jonker as ’n belangrike figuur in Oudtshoorn se sake- en boerderygemeenskap en sê sy heengaan is ’n groot verlies vir die dorp en die Klein Karoo. Volgens Allers het Jonker die Saag Jonker-groep sedert 1976 uitgebou deur volstruisboerdery, verwerking en internasionale bemarking te kombineer. Jonker is in 2000 as Suid-Afrika se Boer van die Jaar aangewys.
Volgens Allers het die groep oor die jare ook in onder meer behuising, sanitasie, kindersorg en ontspanningsgeriewe vir werknemers en hul gesinne belê. Hy sê Jonker was volgens sy familie tot op die ouderdom van 85 by die boerdery betrokke en het steeds gereeld sy plase besoek. Allers het ook sy dank uitgespreek teenoor polisieduikers, nooddienspersoneel, boere, plaaswerkers, vrywilligers en gemeenskapslede wat by die soektog na Jonker betrokke was.
“Saag Jonker laat veel meer as ’n boerdery agter. Hy laat ’n lewenswerk na wat deel van Oudtshoorn se verhaal geword het,” sê Allers. Hy het sy meegevoel met Jonker se vrou, Hazel, sy kinders, werknemers, sakevennote en vriende betuig.
Lees die volledige huldeblyk hier onder:
𝗦𝗔𝗔𝗚 𝗝𝗢𝗡𝗞𝗘𝗥 𝗦𝗘 𝗛𝗘𝗘𝗡𝗚𝗔𝗔𝗡 𝗜𝗦 ’𝗡 𝗚𝗥𝗢𝗢𝗧 𝗩𝗘𝗥𝗟𝗜𝗘𝗦 𝗩𝗜𝗥 𝗢𝗨𝗗𝗧𝗦𝗛𝗢𝗢𝗥𝗡 – 𝗝𝗢𝗛𝗔𝗡 𝗔𝗟𝗟𝗘𝗥𝗦
Raadsheer Johan Allers, leier van die VF Plus Oudtshoorn, het sy innige medelye met die Jonker-familie uitgespreek ná die nuus van die afsterwe van Sagaria “Saag” Jonker. Allers sê hy het geweldig baie respek vir Jonker gehad en beskryf sy heengaan as ’n groot verlies vir Oudtshoorn se sake- en boerderygemeenskap, en vir die Klein Karoo as geheel.
“Saag was een van die mense wat help bou het aan Oudtshoorn se naam as sentrum van die volstruisbedryf. Sy invloed het veel verder as sy eie plase gestrek. Hy het ’n groot onderneming opgebou, werk geskep en gewys wat met harde werk, deursettingsvermoë en vertroue in hierdie streek moontlik is. Ek het die grootste respek gehad vir wat hy bereik het en vir die rol wat hy oor soveel jare in ons gemeenskap gespeel het,” sê Allers.
Jonker het die Saag Jonker-groep sedert 1976 van ’n beskeie begin af uitgebou. Deur volstruisboerdery, verwerking en internasionale bemarking met mekaar te verbind, het hy gehelp om produkte uit die Klein Karoo na die wêreldmark te neem. Sy aanwysing as Suid-Afrika se Boer van die Jaar in 2000 was erkenning vir sy uitsonderlike bydrae tot die landbou.
“Vir Oudtshoorn was Saag veel meer as ’n suksesvolle boer en sakeman. Hy het ’n groot rol in die ekonomiese lewe van ons dorp gespeel. Sy onderneming het ’n bestaan aan werknemers en hul gesinne gebied, terwyl ander plaaslike ondernemings ook deel van daardie groter landboubedryf was. Daarom word sy verlies so wyd gevoel,” sê Allers.
Die Saag Jonker-groep het oor die jare ook in behuising, sanitasie, kindersorg en ontspanningsgeriewe vir werknemers en hul gesinne belê. Plaaswerkers uit die onderneming het erkenning in streeks- en provinsiale kompetisies ontvang. Dié deel van Jonker se nalatenskap herinner daaraan dat ’n boerdery se invloed ook in mense se lewens gemeet word.
Een verhaal gee ’n blik op daardie menslike kant. ’n Plaaswerker wat in 2011 ’n besondere toekenning ontvang het, het vertel hoe die Jonker-gesin hom en sy broers en susters ná hul ma se dood ondersteun het. Jonker het by die prysuitdeling aangekondig dat hy die werker se motorlening by die plaas sou afskryf.
Jonker se belangstelling in die toekoms van die landbou het verder as sy eie onderneming gestrek. Hy het die belang van samewerking tussen boere oor rasgrense heen beklemtoon. Volgens sy familie was hy selfs op 85 nog aktief by die boerdery betrokke en het hy gereeld sy rondtes op die plase gedoen.
“Ons dink vandag veral aan Hazel, sy kinders en die hele Jonker-familie. ’n Gemeenskap kan ’n man vir sy prestasies eer, maar vir sy geliefdes is die verlies diep persoonlik. Namens myself en die VF Plus Oudtshoorn betuig ek ons innige meegevoel met hulle, asook met sy werknemers, mede-boere, sakevennote en vriende,” sê Allers.
Allers bedank die polisieduikers, nooddienspersoneel, boere, werkers, vrywilligers en gemeenskapslede wat by die soektog betrokke was. “Julle bereidheid om te help, het gewys hoe die Klein Karoo in ’n tyd van nood saamstaan. Mag die Jonker-familie krag en vertroosting vind in die dae wat voorlê.”
“Saag Jonker laat veel meer as ’n boerdery agter. Hy laat ’n lewenswerk na wat deel van Oudtshoorn se verhaal geword het. Ons sal hom met groot respek onthou.”
𝗥𝘂𝘀 𝗶𝗻 𝘃𝗿𝗲𝗱𝗲, 𝗦𝗮𝗮𝗴 𝗝𝗼𝗻𝗸𝗲𝗿.
