KWAZULU-NATAL. – ‘n Plaaslike raadslid het in die hospitaal gesterf nadat hy Dinsdagaand in sy huis in Sundumbili geskiet is.
Samantha Meyrick van IPSS Medical Rescue sê die diens is Dinsdagaand uitgeroep deur die Sundumbili-kliniek oor twee skietwond-slagoffers. ‘n Plaaslike raadslid is in ‘n kritieke toestand aangetref, waarna hy eers gestabiliseer is, voordat hy deur gevorderde lewensondersteunende paramedici na ‘n hospitaal gehaas is. Sy suster, wat matige beserings opgedoen het, is ook vir verdere mediese versorging na ‘n nabygeleë fasiliteit vervoer. Die raadslid het egter gesterf.
Meyrick sê volgens inligting was die raadslid en sy suster tuis toe gewapende verdagtes die huis betree en op die raadslid geskiet het. Sy sê Sundumbili-kliniek het ‘n uitstekende werk gedoen om die pasiënte te behandel en te stabiliseer, voordat nooddienste opgedaag het.
Die insident word deur die polisie ondersoek.
Die raadslid se naam is nie bekend gemaak nie.
