RSV (respiratoriese sinsitiale virus) is ’n algemene virus wat meeste kinders een of ander tyd kry. By ouer kinders en volwassenes lyk dit soos ’n gewone verkoue, maar by babas en jong kinders kan dit egter ernstig wees en tot brongiolitis of longontsteking lei. Daar is maniere om ernstige RSV te help voorkom.
Volgens dr. Willem Smit, ’n pediater, loop babas jonger as ses maande die grootste risiko. RSV is een van die hoofoorsake van brongiolitis en verantwoordelik vir meer as die helfte van kinderhospitaalopnames gedurende die winter. Ouers moet dadelik mediese hulp kry as ’n baba vinnig of swaar asemhaal, as die ribbes intrek met asemhaling, of as lippe en naels blouerig lyk. Tekens van uitdroging, uiterste slaperigheid, swak inname van vloeistof of ’n koors wat langer as ’n paar dae aanhou, is ook rede tot kommer. Dokters sal asemhaling, suurstofvlakke en hidrasie toets. Die meeste kinders herstel tuis met rus en genoeg vloeistowwe. Ernstige gevalle mag suurstof of hospitalisasie vereis. Dr. Smit sê ouers moet hul kinders fyn dophou en vroeg hulp soek as hulle bekommerd is. Vinnige optrede kan komplikasies help voorkom.
Maar wat kan ek doen om RSV te voorkom?
-Synagis word aan hoërisiko-babas gegee en word maandeliks in die seisoen toegedien. Dit is duur.
-’n RSV-entstof kan tydens die derde trimester van swangerskap aan die moeder gegee word.
Beyfortus is beskikbaar vir babas in hul eerste RSV-seisoen en beskerm vir sowat vyf maande. Dit kos ongeveer R6 500.
Voorkoming bly belangrik. Was hande gereeld. Hou babas weg van siek mense. Vermy rook in die huis. Hou speelgoed en oppervlaktes skoon. Borsvoeding help om die immuunstelsel te versterk.
Volgens die Nasionale Instituut vir Oordraagbare Siektes (Nios) is RSV in die meeste lande seisoenaal. In Suid-Afrika is die RSV-seisoen jaarliks van Februarie tot Mei, net voor die griepseisoen. Gedurende hierdie tyd raak baie babas en kinders met die virus besmet, hoewel infeksies deur die jaar kan voorkom. RSV veroorsaak lugweginfeksies en kan óf die boonste lugweë (neus en keel) óf die onderste lugweë, soos die longe, affekteer.
