Om ‘n mens se ouderdom te bepaal, is eenvoudig. Jy kyk op ‘n ID of geboortesertifikaat, of vra sommer een van die ouers. Die dag waarop jy gebore is, is jou beginpunt.
Met bome werk dit egter ‘n bietjie anders. As jy na ‘n boom kyk wat 20 jaar oud is, het dit beslis nie so gelyk die dag toe dit uit die grond gespruit het nie. Nie net sy grootte nie, maar ook sy vorm en kompleksiteit verander voortdurend. ‘n Jong boompie groei, kry nuwe takkies en blare, en raak al hoe meer ingewikkeld soos dit groter word.
Mense, aan die ander kant, is anders. Ons word gebore met ons ledemate en vingers, en dit raak net groter soos ons ouer word – daar word niks nuuts bygevoeg nie.
Bome kan egter beter met groepe mense of gemeenskappe vergelyk word. Die dik takke stel die oueres voor, en die jong lootjies is die nuwelinge. Soos die lote volwasse word, verdik hulle en bring hulle op hul beurt nuwe lootjies voort.
As jy geestelik wil groei, sien jouself as ‘n tak van ‘n boom. Jy het voeding nodig van die sterker, ouer takke, en terselfdertyd moet jy voeding gee aan die jonger lote. Daarom is dit noodsaaklik om mentors in die geloof te hê, maar ook om self ‘n mentor en voorbeeld vir ander te wees.
Ek het onlangs ‘n baie rowwe twee weke gehad, en as dit nie vir my geliefde mentors was nie, sou ek waarskynlik steeds in ‘n donker plek gewees het.
As jy sukkel met hoogmoed om lering te ontvang, of luiheid om lering te gee, onthou dat jy nie reg sal groei soos ons Vader dit bestem het nie. En die belangrikste deel van enige boom is sy stam – en dit is ons Here, Jesus Christus! Sonder Hom is daar geen groei nie.
Johannes 15:5
“Ek is die wynstok, julle die lote. Wie in My bly, en Ek in hom, hy dra veel vrug, want sonder My kan julle niks doen nie.”
