KWAZULU-NATAL. – Die hooggeregshof in Durban het Sibongiseni Mkhize (39) en Nkosinathi Ndlovu (41) Vrydag 20 November 2026 elk lewenslange tronkstraf opgelê vir die moord op Russell Cromhout (69) ná ’n huisroof op sy plaas in Waterfall in Mei 2024. Albei mans was ten tyde van die misdaad op parool.
Lt.kol. Paul Magwaza, polisiewoordvoerder, sê ’n vriend het Cromhout op 25 Mei 2024 by sy plaas gaan soek nadat hy hom nie telefonies kon bereik nie. Cromhout was weg, sy huis was deurmekaar, geplunder, sy voertuig en verskeie huishoudelike items was ook vermis.
Nadat die voertuig in Esidumbini in Thongathi opgemerk is, het uMhlali-speurders Mkhize op 1 Junie 2024 in hegtenis geneem. Hy het ’n ongelisensieerde vuurwapen en ses patrone by hom gehad en het die polisie later na Cromhout se liggaam in ’n suikerrietland sowat vyf kilometer van die plaas gelei. Ndlovu is kort daarna in Ntabamhlophe in hegtenis geneem, waar hy met Cromhout se voertuig en van die gesteelde huisware betrap is.
Albei mans is ook aan huisroof skuldig bevind. Mkhize is verder skuldig bevind aan die besit van ’n ongelisensieerde vuurwapen en ammunisie. Die polisieverklaring meld ’n verdere 20 jaar tronkstraf vir huisroof en vuurwapenbesit, sonder ’n uiteensetting van die vonnisse per persoon of aanklag. Die hof het albei mans onbevoeg verklaar om ’n vuurwapen te besit.