FRANKRYK, PARYS. – ‘n Ondersoekspan van vyf ervare polisielede, onder leiding van genl.maj. Maqhashalala, adjunk- provinsiale kommissaris vir misdaadopsporing in die Wes-Kaap, sal saam met Franse owerhede werk om die dood van Nathi Mthethwa, SA-ambassadeur, te ondersoek.
Luidens ‘n gesamentlike verklaring deur die polisie-hoofkantoor en die polisieminister het Firoz Cachalia, die polisieminister, aangekondig dat ’n span van vyf ervare ondersoekbeamptes na Frankryk gestuur is. Genl. Fannie Masemola, polisiekommissaris, sê die besluit is ná konsultasies met Franse owerhede geneem.
Die doel is om ‘n deeglike en deursigte ondersoek te verseker – daar sal deurentyd met die departement van internasionale betrekkinge en samewerking (Dirco) kontak wees. Die gesamentlike ondersoek is daarop gemik om die lopende geregtelike ondersoek te ondersteun en die beginsels van geregtigheid en aanspreeklikheid te handhaaf.
