LIMPOPO. – Vyf lede van die Suid-Afrikaanse Nasionale Weermag (SANDF), insluitend ’n vroulike soldaat en twee ongedokumenteerde Zimbabwiërs, sal vandag (Donderdag) in die Musina-landdroshof verskyn. Hulle word van korrupsie, die besit van onwettige sigarette, onwettige vuurwapengebruik, dwarsboming van die gereg, oortreding van die immigrasiewet, die onwettige besit van ammunisie en die voordoen as militêre beamptes aangekla.
Brig. Hlulani Mashaba, polisiewoordvoerder, sê in ‘n verklaring die verdagtes, tussen 26 en 42 jaar oud, is op 16 September tydens ’n gesamentlike operasie deur die polisie en militêre intelligensie vasgetrek. Die inhegtenisnemings volg op ’n voorval by Artonvilla, naby die Limpoporivier, waar hulle glo ’n sending onwettige sigarette wou onderskep en steel. Tydens die operasie is skote geskiet en 24 bokse onwettige sigarette is agtergelaat, waarvan ses later in ’n tydelike militêre kamp gevind is. Verdere ondersoek het tot nog inhegtenisnemings in Matswale gelei, waar onder meer 18 rondtes lewendige ammunisie, weermaguniforms en bykomende vuurwapens gevind is.
Die SANW het die inhegtenisnemings Woensdag in ‘n uitgereikte verklaring bevestig.
