KAAPSTAD. – Die Stad Kaapstad nooi inwoners uit om op Erfenisdag 24 September enige van die stedelike natuurreservate gratis te besoek. Die 16 reservate en ander beskermde gebiede bied die geleentheid om die lenteblomme te bewonder, staproetes te geniet of ’n gesinsbraai en piekniek te hou.
Die aanbod geld vir reservate wat normaalweg toegangsgeld hef, insluitend Tafelbaai, Blaauwberg, Tygerberg en Helderberg. Gewone tariewe vir toegelate ontspanningsaktiwiteite by die reservate sal steeds van toepassing wees.
Volgens die Stad se adjunkburgemeester en Mayco-lid vir ruimtelike beplanning en omgewing, Eddie Andrews: “Ons is bevoorreg om omring te wees deur die ongerepte natuurlike skoonheid van die stad. Ons moedig inwoners aan om hul plaaslike reservaat te besoek, of om ’n reservaat aan die ander kant van die stad te verken vir ’n staptog, braai of gesinspiekniek.”
’n Paar voorbeelde van reservate sluit in Blaauwberg, Valsbaai, Durbanville, Tygerberg en Helderberg. Vir meer besonderhede oor die fasiliteite en ligging van al die reservate wat besoek kan word, druk hier.
Lees die volledige verklaring vir meer inligting hier.
