VRYSTAAT. – ‘n Seun (11) het Saterdag omstreeks 15:30 by ‘n konstruksieterrein in die K5-afdeling van Kutlwanong, Odendaalsrus verdrink. Die Odendaalsrus-polisie het ‘n geregtelike doodsondersoek geopen.
Sers. Palesa Thabana, polisiewoordvoerder, sê in ‘n verklaring die polisie is na die toneel ontbied waar hulle ingelig is dat drie seuns tussen 10 en 11 glo in ’n uitgrawing gevul met afvalwater geswem het en in die modder vasgeval het. Twee van die seuns, beide 10 jaar oud, het daarin geslaag om uit te kom, maar die 11-jarige het in die modder vasgeval en verdrink.
Die Welkom-duikeenheid onder bevel van sers. Arno Cronje is na die toneel ontbied. Lede van die eenheid, saam met die Matjhabeng-brandweerdiens, het die liggaam van die seun omstreeks 20:20 die aand uit die rioolput gehaal. Die seun is op die toneel deur nooddienste dood verklaar. Sy naasbestaandes het hom intussen geïdentifiseer.
Thabana sê owerhede doen ’n beroep op ouers om hul kinders in te lig oor waterveiligheid en die gevare van swem in besoedelde water.
