KWAZULU-NATAL. – ‘n Skedel en beendere, wat vermoedelik dié van ‘n persoon is wat selfdood gepleeg het, is Dinsdagoggend in bosse langs Pinewoodweg in Ottawa ontdek.
Reaction Unit South Africa (Rusa) sê reaksiebeamptes is omstreeks 10:30 na die toneel ontbied nadat werknemers van Project 360 hulp versoek het. Volgens hulle het ‘n lid van die publiek ‘n veiligheidsbeampte by ‘n nabygeleë perseel ingelig van die oorskot waarop hy afgekom het.
Die man het glo langs die spoorlyn gestap toe hy ‘n menslike skedel teen ‘n wal opgemerk het. Met verdere ondersoek het hy ‘n tou vasgebind aan ‘n boom gesien, terwyl ‘n broodkrat onder die boom op sy sy gelê het. Die skedel is langs die krat aangetref en beendere was oor die omliggende gebied versprei. Van die bene was gedeeltelik met blare en sand bedek, wat daarop dui dat die oorskot reeds vir ‘n geruime tyd daar gelê het.
Rusa sê die polisie ondersoek die omstandighede van die voorval en probeer die identiteit van die oorledene vasstel.
