NOORD-KAAP. – Dawid Brummer (29) is op 10 Februarie 2024, omstreeks 19:20, met steekwonde op ‘n plaas buite Victoria-Wes aangetref. Danster Jansen (38) is vir die moord gevonnis.
Sers. Molefi Shemane sê die polisie is na ‘n moordtoneel op die plaas uitgeroep, waar Brummer se liggaam aangetref is. Jansen is in hegtenis geneem en borg geweier.
Op 29 Augustus is Jansen deur die Victoria-Wes-streekhof skuldig bevind en tot 10 jaar tronkstraf gevonnis.
“Die harde werk en deursettingsvermoë deur speursers. Basil Abrahams van die Victoria-Wes-speureenheid het die moordvonnis van Danster Jansen (38) verseker.”
Shemane sê kontakmisdaad bly vir die polisie ‘n prioriteit en speurders sal daaraan werk om stewige vonnisse te verseker.
