NOORD-KAAP. – Die Sol Plaatje-munisipaliteit het inwoners gewaarsku om ekstra waaksaam te wees ná ’n reeks van 10 brandstigtingsvoorvalle by kragbokse, wat vermoedelik met koperkabeldiefstal verband hou.
Volgens Thabo Mothibi, munisipale woordvoerder, het twee nuwe voorvalle Woensdagoggend vroeg in Florianville plaasgevind, terwyl nog een in De Beers aangemeld is. Dit bring die totaal op tien brandstigtingsvoorvalle sedert verlede week te staan, wat meestal tussen middernag en 04:00 plaasgevind het. Die munisipaliteit sê die aanvalle lyk soos ’n gekoördineerde poging, nadat sewe kragbokse reeds verlede week aan die brand gesteek is. In een van die gevalle was dele van Beaconsfield vir meer as 48 uur sonder elektrisiteit, wat inwoners groot ontwrigting veroorsaak het.
Inwoners word gewaarsku dat beskadigde kragbokse steeds lewendige elektrisiteit kan bevat en dus gevaarlik is. Die publiek word dringend versoek om nie naby sulke strukture te kom nie. Die herstelwerk aan die beskadigde infrastruktuur sal tyd neem en groot kostes meebring, wat uiteindelik op belastingbetalers se skouers val. Voortdurende kragonderbrekings, veral tydens die winter, het ook ’n ernstige impak op huishoudings, veral waar mense afhanklik is van elektrisiteit vir verwarming en mediese redes.
Die munisipaliteit doen ’n beroep op inwoners om enige verdagte gedrag onmiddellik by die polisie aan te meld. Mense word daaraan herinner dat die beskadiging van elektriese infrastruktuur ’n misdaad is en dat oortreders vervolg sal word.
Die polisie in die groter Kimberley-gebied het kommer uitgespreek oor ’n toename in gevalle waar kragbokse beskadig word, wat wydverspreide kragonderbrekings veroorsaak. Volgens polisiewoordvoerder, kol. Cherelle Ehlers, bly die beskerming van noodsaaklike infrastruktuur ’n hoë prioriteit vir die polisie. Volgens die polisie speel infrastruktuur soos elektrisiteit, water, sanitasie, kommunikasie en vervoer ’n kritieke rol in basiese dienslewering en enige skade daaraan stel die publiek se veiligheid en welstand in gevaar. Die polisie beklemtoon dat die beskadiging, manipulasie of vernietiging van hierdie infrastruktuur ’n strafbare oortreding is.
In reaksie op die toenemende probleem word inwoners en eiendomseienaars aangemoedig om voorkomende stappe te neem, insluitend die installering van fisiese veiligheidsmaatreëls soos hekke, impakbestande glas en sterk slotte, asook goeie beligting binne en buite persele. Die polisie beveel ook aan dat beskadigde infrastruktuur so gou moontlik herstel word om verdere skade te voorkom. Verder word die installering van veiligheidskameras en die gebruik van geregistreerde veiligheidsdienste aangemoedig, asook samewerking met die polisie deur verdagte aktiwiteite en inligting oor misdadigers aan te meld. Die polisie waarsku verder dat die diefstal van metale, insluitend koper en ander ferrometale, ’n ernstige ekonomiese bedreiging inhou wat gesamentlike optrede van alle rolspelers vereis. Die publiek word versoek om enige verdagte goedere wat moontlik gesteel is, aan te meld. Alle inligting sal streng vertroulik hanteer word.
