Somaliërs vir ‘bedrog en korrupsie’ vasgetrek

MPUMALANGA. – Drie Somaliërs is Dinsdag tydens grenskontrole-operasies deur die polisie en Interpol in Komatipoort in hegtenis geneem. Tydens die operasie is dokumente nagegaan om gesoekte persone aan te keer, sowel as gesteelde en bedrieglike reisdokumente te identifiseer.

Volgens polisiewoordvoerder, lt.kol. Vincent Mukhathi, is Falis Addullah Sheik-Mohamed (40) in besit van ’n ongeldig verklaarde Noorse paspoort vasgetrek. Die beskuldigde het ook nie oor ‘n visum beskik nie en is toegang tot Mosambiek geweier. Sy het haar broer gekontak om haar te help, waartydens daar probeer is om ’n grensbeampte met R2 000 om te koop om haar vrylating by ’n Spur-restaurant in Komatipoort te bewerkstellig. Hussein Mohamed Ali (44), Sheik-Mohamed se broer en Mukhtaar Mohamed (38), hulle bestuurder, is kort daarna in hegtenis geneem.

Die owerhede het op selfone, kontant, die paspoort en ‘n BMW X3 beslag gelê. Die drie is by Komatipoort-polisiekantoor aangehou. Hulle het reeds op aanklagte van bedrog, korrupsie en onwettige immigrasie in die Komatipoort-landdroshof verskyn. Die saak is tot 17 en 20 Maart uitgestel.