GAUTENG. – Die Gautengse departement van gesondheid het nuwe maatreëls ingestel om die verspreiding van seksueel oordraagbare infeksies (SOI’s) te bekamp. Dit sluit sifting en gevalopsporing by mansklinieke, werkplekke, kampusse en sentrums vir besnyding in. ‘n Toename van minder as 60 000 tot meer as 80 000 is in vier jaar aangeteken.
Nomantu Nkomo-Ralehoko, Gesondheids-LUR, sê die departement sal gesondheidsdienste uitbrei deur mobiele klinieke en uitreikprogramme in hoërisiko-gebiede. “Ons sal voortgaan om sosiale media en gemeenskapsradiostasies te gebruik om gesondheidsopvoeding te bevorder,” het sy gesê.
Die departement het tussen 2020 en 2024 ’n toename van 55 783 tot meer as 80 000 in gevalle van manlike uretritis-sindroom aangeteken. Nkomo-Ralehoko sê die uitbreiding van MIV-voorkomende behandeling het gehelp om nuwe infeksies te verminder, met positiewe gevalle wat van 4,6% in 2020 tot 1,3% in 2024 gedaal het.
Sy moedig die publiek aan om gereeld gesondheidsfasiliteite vir sifting en vroeë behandeling van SOI’s te besoek.
