HOUTBAAI, WES-KAAP. – ’n Vrou (47) is Saterdag uit die Llandudno-kloof bo Houtbaai gered nadat sy geval het toe sy en ’n stapgroep op pad bergaf was.
Die groep van agt stappers het vroeër die oggend in Corridor-kloof begin en beplan om oor Twaalf Apostels te loop. Met die afgaan by die Llandudno-kloof het die vrou skeef getrap en ’n ent na onder geval.
Nooddienste is na die toneel ontbied toe die vrou nie verder weens haar besering kon stap nie. Sy is met ’n helikopter van die berg af gevlieg. Die res van die groep is bergaf vergesel.
Bron: Wilderness Search And Rescue WSAR Western Cape
