VRYSTAAT. – ‘n Stiefpa (45) is op 7 Mei in hegtenis geneem nadat ‘n aanklag van verkragting van sy stiefdogter (17) teen hom gemaak is.
Kapt. Stephen Thakeng sê die meisie se ma was op 6 April omstreeks 16:00 nie by die huis nie. Die verdagte het glo vir die stiefdogter drank gegee en sy het gaan slaap. Daarna is sy glo beveel om te ontklee en is sy verkrag. Sy het haar broer daarna van die voorval vertel.
Op 7 Mei is die meisie deur haar ma na ‘n maatskaplike werker geneem. Die meisie het in alleenkonsultasie vir die maatskaplike werker van die beweerde verkragting vertel. ‘n Saak is by die Thabong-polisiestasie oopgemaak en die stiefpa is op dieselfde dag in hegtenis geneem.
Die saak word verder deur Thabong-GKS ondersoek.
Die stiefpa sal op 9 Mei in Welkom-landdroshof verskyn.
