MPUMALANGA. – ’n Man (43) van Eswatini is Vrydag 5 Desember in Sundra, Delmas, deur die polisie in hegtenis geneem vir die beweerde besit van sigarette ter waarde van ongeveer R17,4 miljoen. Die sigarette is in watertenks vervoer.
Lt.kol. Jabu Ndubane, polisiewoordvoerder, sê in ‘n verklaring die polisie het inligting ontvang oor die sigarette wat vervoer word. Delmas-polisie het omsreeks 22:00 met behulp van Sundra-polisie en veiligheidsmaatskappye die inligting nagegaan, waartydens die vragmotor met twee sleepwaens in Sundra opgemerk en gestop is. Die vragmotor en sleepwaens het 12 watertenks vervoer. Die 12 watertenks met ‘n kapasiteit van 5 000-liter was gepak met verskeie handelsmerke sigarette. In totaal is daar op 25 pallette sigarette beslag gelê.
Die verdagte het op aanklag van die besit van onwettige goedere in die Delmas-distrikshof verskyn.
