KWAZULU-NATAL. – ’n Seun (17) het Maandagoggend in ’n dam tussen Monzi en Mtubatuba, landinwaarts van St Lucia, verdrink.
Luidens ‘n verklaring deur Craig Lambinon, NSRI-woordvoerder, sê Melinda Snyman, die stasiebevelvoerder van St.Lucia, die reddingspan is ná 07:00 vir ‘n verdrinking ontbied. Die polisie het hulle saam met die NSRI na die toneel gehaas. Met aankoms het die gemeenskap aangedui waar die tiener vermoedelik onder die water was. NSRI-swemmers het die dam deursoek en die seun se liggaam saam met die polisie aan land gebring. Hy is op die toneel dood verklaar.
Die liggaam is aan die polisie en staatspatoloog oorhandig, waarna die polisie ‘n geregtelike doodsondersoek geopen het.
