GAUTENG. – Die Suid-Afrikaanse Nasionale Weermag (SANW) het Woensdag duidelikheid gegee oor die toelaestruktuur vir troepe wat aan buitelandse missies deelneem.
Prince Tshabalala, die direkteur van verdedigingskorporatiewe kommunikasie, sê in ‘n verklaring elke land wat troepe bydra, het sy eie beleid ten opsigte van die toelaes wat aan personeel, in ooreenstemming met nasionale regulasies en finansiële raamwerke, betaal word. Die Suider-Afrikaanse Ontwikkelingsgemeenskap (SAOG) ken fondse ter ondersteuning van ontplooide lede aan bydraende nasies toe. Benewens die fondse wat deur die streeksliggaam voorsien word, word die ontplooide soldate volgens departementele beleide en voorskrifte van die SANW vergoed.
“Hierdie toelaes word maandeliks aan die ontplooide soldate betaal.”
Die SAOG het bewerings van verwaarloosde troepe in Goma in ‘n verklaring weerlê en sê feite moet voor publikasie verifieer word om die integriteit van streekinisiatiewe te beskerm. Dit volg nadat op 18 Mei berig is dat troepe verwaarloos is. Volgens SAOG is beweer dat daar nie vervoerreëlings vir Suid-Afrikaanse soldate was nie, maar dié bewerings is nie vooraf met SAOG bevestig nie. SAOG het bevestig dat alle operasionele en logistieke reëlings vir die onttrekking van troepe volgens ’n gesamentlik goedgekeurde plan verloop.
Brig. Molahiem M. Ntelamo van die SAOG sê: “Hierdie bewerings is ongegrond en weerspieël nie die werklike situasie op die grond nie.”
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
