KAAPSTAD. – Die Vryheidsfront Plus (VF Plus) het ernstige kommer uitgespreek oor die toenemende hoeveelhede riool wat in die see rondom Kaapstad gestort word. Hierdie eskalerende kwessie is besig om ‘n groot omgewings- en gesondheidsrisiko te word, veral in die lig van onlangse pompstasie-onderbrekings, soos die onklaarraking by Seepunt verlede week.
Pieter Jansen van Vuuren, VF Plus-raadslid van die Stad Kaapstad, het gesê die situasie is benard en kan nie langer geïgnoreer word nie. “Die probleem is heeltemal te lank uitgestel. Met Kaapstad se vinnig groeiende bevolking, is vinnige en besliste optrede nodig voordat dit in ‘n volskaalse gesondheidskrisis verander,” het hy gesê.
’n Verslag wat vroeër vanjaar op 12 Februarie 2024 deur Moneyweb gepubliseer is, het Kaapstad se seegebonde rioolprobleem uitgelig en onthul dat ongeveer 32 miljoen liter onbehandelde riool daagliks in die see gepomp word. Volgens die verslag sluit die gebiede wat die meeste geraak word Groenpunt, Seepunt en Houtbaai in, met Kampsbaai alleen wat elke dag sowat 2 miljoen liter riool in die see sien pomp.
Hierdie strande, wat groot toeriste-aantreklikhede is, trek jaarliks miljoene besoekers. Die omgewingsrisiko is duidelik, en die potensiële gesondheidsgevaar vir inwoners en toeriste word al hoe dringender. “Om te ontken dat dit ’n ernstige probleem is, sal oneerlik wees en ’n bedrieglike poging om die publiek in ’n valse gevoel van veiligheid te sus,” het Jansen van Vuuren bygevoeg.
Die Stad Kaapstad monitor gereeld die watergehalte rondom die Atlantiese kuslyn, wat aandui dat hy deeglik bewus is van die gevare wat besoedeling inhou. Die situasie het egter verlede Woensdag ‘n kritieke punt bereik toe ‘n pomp by Groenpunt wanfunksioneer het, wat die oorblywende pompe nie in staat gelaat het om die groot hoeveelhede riool tydens spitstye te hanteer nie. Dit het daartoe gelei dat onbehandelde riool in die see gemors het.
“Dit is totaal onaanvaarbaar,” het Jansen van Vuuren gesê. “Dit is onvermydelik dat masjinerie onklaar raak, maar om nie ‘n noodgevalplan in plek te hê nie, is onverantwoordelik. Dieselfde kwessie het onlangs in Houtbaai en ander gebiede voorgekom, wat wys dat die huidige stelsel begin misluk.”
Kaapstad stort al dekades lank riool in die see, en ’n uitvoerbaarheidstudie wat vroeër vanjaar gedoen is, het aan die lig gebring dat dit tot R8 miljard kan kos om die probleem aan te spreek. Die stad sal óf nuwe afvalwaterbehandelingsaanlegte moet bou óf riool na bestaande fasiliteite moet herlei.
Die Stadsraad het verlede week sy 2024-strategie vir waterbestuur goedgekeur in ’n poging om bykomende finansiering van die Nasionale Tesourie te bekom. Jansen van Vuuren voer egter aan dat hierdie benadering onvoldoende is. “Die VF Plus doen ‘n beroep op die Stad Kaapstad om dit as ‘n dringende saak te hanteer. Die bestaande infrastruktuur verkrummel en onvoldoende, en werk moet dadelik begin.”
Soos die situasie vererger, beplan die VF Plus om ontwikkelinge fyn dop te hou en aanbevelings aan die betrokke Portefeuljekomitee te maak. Jansen van Vuuren het beklemtoon dat Kapenaars reeds hoë belasting betaal en die stad se inwoners verdien beter. “Lojale, oorbelaste burgers moenie in ‘n see van riool hoef te swem nie. Die DA-geleide stadsraad moet nou optree om sowel die omgewing as die gesondheid van Kaapstad se mense te beskerm.”
Nuusflits het navraag by die Stad Kaapstad gedoen.
