VSA. – Die Amerikaanse president, Donald Trump, het op Truth Social aangekondig dat die skietstilstand met Iran, wat Woensdagaand sou verstryk, verleng word. Volgens hom is die besluit geneem op versoek van Pakistanse bemiddelaars, insluitend die militêre leier Asim Munir en eerste minister Shehbaz Sharif, om Iran meer tyd te gee om ’n “verenigde voorstel” vir die beëindiging van die oorlog saam te stel.
Volgens NBC News het diplomatieke pogings om die konflik te beëindig ’n wankelrige verloop gevolg. ’n Beplande besoek deur die Amerikaanse vise-president, JD Vance, na Islamabad vir vredesonderhandelinge is op die nippertjie uitgestel.
Trump se besluit was die tweede keer dat hy teruggekrabbel het van ’n dreigement om die oorlog te eskaleer, en sodoende vir homself meer tyd gekoop het om die konflik af te skaal. Hoewel daar onsekerheid bestaan oor Iran se deelname aan die onderhandelinge, het Trump optimisme uitgespreek oor ’n moontlike ooreenkoms. “Ons gaan uiteindelik ’n goeie ooreenkoms bereik,” het hy gesê.
Die wêreld wag gespanne op enige teken van ’n deurbraak in die vredespogings, terwyl die konflik reeds byna twee maande duur.
Bronne: NBC News, Axios, BBC
