GAUTENG. – Die Tshwane-stadsraad het besluit om dissiplinêre stappe teen die stad se hoof finansiële beampte, Gareth Mnisi, in te stel ná bewerings wat voor die Madlanga-kommissie van ondersoek geopper is. Die raad het ook goedgekeur dat hy voorlopig geskors word hangende verdere ondersoek.
Dr. Nasiphi Moya, die uitvoerende burgemeester van Tshwane, sê die besluit is geneem om ’n behoorlike proses te volg en die bewerings deeglik te ondersoek. Sy het beklemtoon dat Mnisi die geleentheid sal kry om binne sewe dae redes aan te voer waarom hy nie geskors moet word nie, waarna ’n finale besluit geneem sal word. Die Stad het aangedui dat ’n onafhanklike ondersoeker aangestel sal word om die aantygings van moontlike wangedrag te ondersoek. Die doel is om te verseker dat die proses objektief en geloofwaardig is. Volgens die Stad is die stap nie ’n skuldigbevinding nie, maar ’n voorsorgmaatreël om ’n regverdige en deursigtige ondersoek moontlik te maak. Mnisi was die afgelope week met verlof terwyl die Stad die nodige prosedures voorberei het.
Die Tshwane-metro sê die aangeleentheid sal hanteer word volgens toepaslike wetlike en bestuursraamwerke, en dat verdere optrede op grond van die bewyse geneem sal word.
Intussen het Cilliers Brink, die voormalige burgemeester, gesê die Demokratiese Alliansie het bewyse by die Madlanga-kommissie ingedien wat verband hou met ernstige aantygings. Volgens hom raak die bewerings onder meer Mnisi, die adjunkburgemeester, Eugene Modise, asook ander politieke rolspelers wat met die ANC, ActionSA en die EFF verbind word. Brink sê die saak is nou amptelik op rekord nadat ’n verwysingsnommer uitgereik is, en dat daar aangedring word op volle aanspreeklikheid en ’n deeglike ondersoek.
